Tillögur /

Ægisíða

Þróun lóðar við Ægisíðu 102 /

Arkitektastofan Trípólí kemur að þróun Ægisíðu 102

Valnefnd Festi um þróun bensínstöðvarlóðarfélagsins við Ægisíðu 102 í Reykjavík, sem hýsti áður þjónustustöð N1, hefur ákveðið að tillaga arkitektastofunnar Trípólí verði fyrsti valkostur nefndarinnar í frekari úrvinnslu og þróun lóðarinnar að breyttu hlutverki til framtíðar. Í tillögu Trípólí er m.a. gert ráð fyrir að núverandi mannvirki standi að mestu leyti áfram og sé ætlað að mynda áfram sterkt kennileiti á staðnum. Í kringum það rísi síðan randbyggð með vistlegum torg- og dvalarsvæðum og að bílaumferð verði beint í bílakjallara undir suðurhluta lóðarinnar í næst götu.

Í niðurstöðu valnefndar segir m.a. að nefndin telji bæði raunhæft og hóflegt að við frekari þróun á tillögu Trípólí verði horft til hærra nýtingarhlutfalls innan svæðis með frekari samtengingum bygginga og hækkun á einstaka byggingarhlutum. Þá verði við frekari þróun atvinnuhúsnæðis horft til íbúðalausna með tengdu atvinnurými. Telur valnefnd það vera raunhæfari kost en hrein atvinnurými m.a. með hliðsjón af aðkomu, nálægð við þjónustu innan hverfis og raunhæfni annars rekstrar innan hverfis. Þá verði ennfremur litið til þess við frekari þróun að skoða aukna fjölbreytni í íbúðategundum og stærðum. Þrjár arkitektarstofur voru valdar til að vinna tillögur að hönnun og skipulagi á lóðinnar við Ægisíðu og var sérstakri valnefnd falið að velja þá tillögu sem best þætti falla að áformum um vinnu við deiliskipulag sem tæki mið af aðalskipulagi Reykjavíkur til 2040. Valnefndina skipuðu Guðrún Ingvarsdóttir, arkitekt, G. Oddur Víðisson, arkitekt og Óðinn Árnason, framkvæmdastjóri Yrkis.

Frekari þróun mun eiga sér stað í samvinnu við tillögu höfunda og í samráði við Umhverfis- og skipulagssvið Rvk. Að teknu tilliti til þessara áhersluþátta telur valnefnd að tillaga Trípólí verði til þess fallin að efla borgarlíf og byggð við Ægisíðu um leið og sögu svæðisins verði sýndur sómi með endurnýtingu í anda sjálfbærrar þróunar.

Þróun Ægisíðu 102

Í erindisbréfi samninganefndar Reykjavíkurborgar vegna viðræðna við rekstraraðila og lóðarhafa bensínstöðvalóða í Reykjavík kemur fram að borgin setji í forgang að fækka bensínstöðvum í eða nálægt þéttum íbúðarbyggðum í borgarlandinu. Bensínstöð N1 við Ægisíðu 102 er ein þeirra bensínstöðva.

Í viðræðum við Yrkir, sem er fasteignafélag í eigu eiganda lóðarinnar að Ægisíðu 102, óskaði Reykjavíkurborg eftir því að lóðareigandi þróaði eigin hugmyndir um framtíðarhlutverk og skipulag lóðarinnar. Kom þar jafnframt fram sú áhersla borgarinnar að hugmyndirnar skyldu taka mið af markmiði um „þétta og góða borgarbyggð“.

Hugmyndaleit

Að lokinni ítarlegri greiningu ákváðu Yrkir að efna til hugmyndaleitar meðal arkitekta með forsögn, þar sem verkefnið er útskýrt. Ástæða þess að þessi leið varð fyrir valinu er sú að mikil umræða á sér stað í nærsamfélaginu um framtíð lóðarinnar þar sem ýmsar hugmyndir hafa komið fram.

Í áðurnefndri forsögn var m.a. lögð áhersla á að hugmyndirnar yrðu í samræmi við áherslur sem fram koma í Aðalskipulagi Reykjavíkur. Að auki var áhersla lögð á að hugmyndir fælu í sér góðan arkitektúr, aðlaðandi íbúðabyggð, sem falli vel að umhverfi sínu og sýni nærgætni við nærliggjandi íbúðabyggð.

Áhersla á aðlaðandi íbúðabyggð

Mikilvægt er í verkefni sem þessu að afraksturinn verði góður arkitektúr sem falli vel að umhverfi sínu. Óskað var eftir við þátttakendur að tillögur þeirra sýni hönnun og útfærslu bygginga á lóð og samspil þeirra við nærumhverfi, blöndun íbúða og atvinnurýma, stærðir húsa, húsagerðir, efnisval, opin svæði og aðkomu. Jafnframt afmörkun íbúða og mögulegra atvinnurýma, stærð þeirra og fjölda, ásamt fyrirkomulagi á lóð með dvalarsvæðum, gróðursvæðum, bíla- og hjólastæðum. Markmiðið með því er að skapa grundvöll fyrir samtal um áherslur í borgarþróun milli allra aðila máls; íbúa, lóðarhafa og Reykjavíkurborgar sem jafnframt taka mið af áformum Aðalskipulags Reykjavikur 2010- 2040 (AR2040) um þéttingu byggðar.

Virk tengsl milli hverfa og hverfahluta

Vel heppnuð þétting er þar sem ólíkir tímar mætast í einu og sama hverfinu, þar sem tekið er tillit til umhverfis og nærgætni sýnd aðliggjandi byggð. Þéttingin þarf að skapa virk tengsl milli hverfa og hverfahluta, hún þarf að auka virkni og fagurfræði borgarumhverfisins, skapa þéttleika íbúðabyggðar, þjónustu og vinnustaða og þar með gera umhverfið sjálfbærara. Með virku og vel hönnuðu umhverfi er þetta hægt en vandvirkni er þar mikilvæg. Aðrir þættir eins og viðeigandi byggingarhæðir, opin rými, jaðrar bygginga og gönguvæni umhverfisins eru einnig mikilvægir til að fá fram gæði í þéttingu byggðar.

Þrjár arkitektasofur valdar til þátttöku

Valdar voru þrjár arkitektastofur til þátttöku, Gríma arkitektar, Sei studio og Trípólí arkitektar. Forsögn þátttakenda tók mið af Aðalskipulagi Reykjavíkur 2010-2040 sem er í gildi fyrir lóðina og svæðið um kring. Hugmyndaleitin er til þess gerð að velja megi eina tillögu til áframhaldandi þróunar í framhaldi af samtali við skipulagsyfirvöld og nærsamfélagið.

Þátttakendur hafa skilað af sér þeirri afurð sem óskað var eftir af hálfu lóðareiganda við upphaf hugmyndaleitarinnar.